Jeremiah 26

Lau sebe sênac Jeremia êndu

1Kiŋ Judaŋa Josia latu Jojakim kêkôc gôliŋ sa wakucgeŋ ma Apômtaunê biŋ tonec mêŋkêsa. 2Apômtaunê biŋ tau tonec gebe “Naôkô Apômtaunê andu ŋamalacluŋ ma ôsôm biŋ samob, taŋ jajatu aôm gebe ôsôm êndêŋ lau aŋga malac Judaŋa samob, taŋ sêmêŋ gebe teteŋ mec aŋga Apômtaunê andu naŋ. Ôŋgamiŋ biŋ teŋ atom. 3Moae êsêac oc sêkêŋ taŋeŋ ma samob sênam tauŋ ôkwi amboac tonaŋgeŋ ma jaŋgôm gêŋ, taŋ taêc gêjam gebe jaŋgôm êndêŋ êsêac êtu nêŋ sec, taŋ sêgômŋa naŋ atom. 4Ôsôm êndêŋ êsêac gebe Apômtau kêsôm biŋ tonec gebe Amac embe akêŋ taŋem aê atom ma asa lêŋ êtôm ŋoc biŋsu, taŋ kakêŋ gêdêŋ amac naŋ atom 5ma amac embe aŋô ŋoc sakiŋwaga propete, taŋ kasakiŋ êsêac kakacgeŋ gêdêŋ amac naŋ, nêŋ biŋ atom amboac agôm-agôm amoa, 6go jaŋgôm andu tonec êtôm gagôm gêdêŋ Silo ma tenteŋlatu aŋga nom ŋagamêŋ samob embe sêpuc boa lau, go sêsam malac tonec ŋaê.”

7Dabuŋwaga to propete ma lau samob sêŋô Jeremia kêsôm biŋ tonaŋ aŋga Apômtaunê andu. 8Ma gêdêŋ taŋ Jeremia gêjac mata nê biŋ, taŋ Apômtau kêjatu gebe êsôm êndêŋ lau samob naŋ, dabuŋwaga to propete ma lau samob sêkôc eŋ tôŋ ma sêsôm gebe “Aôm oc ômac êndu. 9Aôm goc biŋ lasê gôjam Apômtau laŋô ma kôsôm gebe ‘Andu tonec oc êtôm Silo ma malac tonec oc êtu tuc ma lau teŋ sêŋgôŋ ŋalêlôm êtiam atom kêtu asageŋŋa.’” Ma lau samob sêkac sa mêŋsêgi Jeremia auc aŋga Apômtaunê andu.

10Gêdêŋ taŋ Judanêŋ kasêga sêŋô biŋ tau naŋ, êsêac sêwi kiŋnê andu siŋ jasêsô Apômtaunê andu ma sêŋgôŋ Apômtaunê andu ŋasacgêdô, taŋ sêsam gebe Sacgêdô Wakuc naŋ ŋalêlôm. 11Go dabuŋwaga to propete sêsôm gêdêŋ kasêga to lau samob gebe “Ŋac tonec êtap ŋagêjô êmac ênduŋa sa gebe eŋ geoc malac tonec ênaŋa ŋabiŋ lasê amac taôm aŋô kêsô taŋemsuŋgac.”

12Go Jeremia kêsôm biŋ gêdêŋ kasêga to lau samob gebe “Apômtau kêsakiŋ aê gebe jaoc andu tonec to malac tonec ênaŋa ŋabiŋ, taŋ aŋô su naŋ lasê. 13Amboac tonaŋ galoc amêtôc nêm lêŋ to nêm kôm ma taŋem wamu amacnêm Apômtau Anôtô awa, go Apômtau ênam biŋ sec, taŋ kêsôm lasê kêpi amac naŋ ôkwi. 14Tageŋ aê tauc, tec kasêp amac lemem sugac, tec aŋgôm aê êtôm alic ŋajam to naêndêŋgeŋ naŋ. 15Mago ajala biŋ tageŋ tonec êtu tôŋ gebe amac embe anac aê êndu, go ŋac tobiŋmê nê dec ŋagêjô êpi amac taôm ma malac tonec to ŋalau, taŋ sêŋgôŋ ŋalêlôm naŋ, gebe Apômtau kêsakiŋ aê gadêŋ amac biŋŋanôgeŋ gebe jasôm biŋ samob tonaŋ ŋai êsô amac taŋemsuŋ.”

16Go kasêga to lau samob sêsôm gêdêŋ dabuŋwaga to propete gebe “Ŋac tonec êwê kaiŋ ŋagêjô êmac ênduŋa atom gebe eŋ kêsôm biŋ gêdêŋ aêac gêjam aêacnêŋ Apômtau Anôtô laŋô.” 17Ma gamêŋ tau ŋalaumata ŋagêdô dêdi ma sêsôm gêdêŋ lau samob, taŋ sêkac tauŋ sa naŋ, gebe 18“Gêdêŋ Judanêŋ kiŋ Hiskia propete Mika aŋga Moreset geoc biŋ lasê ma kêsôm gêdêŋ Judanêŋ lau samob gebe ‘Lausiŋ undambêŋa nêŋ Apômtau kêsôm biŋ tonec gebe

Oc sêkac Sion ôkwi amboac sêkac nom ôkwi aŋga kôm.
Jerusalem popoc-popocgeŋ êtu lênduc
ma lôc lôm dabuŋŋa ênam- tau ôkwi êtu saleŋbôm.’
19Judanêŋ kiŋ to lau Juda samob sêjac ŋac tau êndu me. Êsêac têtêc Apômtau ma teteŋ eŋ, tec gêjam biŋ wapac, taŋ kêsôm lasê kêpi êsêac naŋ, ôkwi atom me. Ma galoc aêac dabe takalem gêŋwapac tau mêŋêpi aêac me.”

20Ŋac teŋ gêmoa. Eŋ geoc biŋ lasê gajam Apômtau laŋô amboac tonaŋ. Eŋ Semaia latu Uria aŋga Kiriat-Jearim. Eŋ geoc malac tonec to gamêŋ tonec ênaŋa ŋabiŋ lasê kêtôm Jeremianê. 21Ma gêdêŋ taŋ kiŋ Jojakim to nê lausiŋ ma nê kasêga samob sêŋô ênê biŋ naŋ, kiŋ tau gebe ênac eŋ êndu. Mago Uria gêŋô ŋawae, tec kêtêc tau ma gêc gêja Aiguptu. 22Go kiŋ Jojakim kêsakiŋ Akbor latu Elnatan to lau ŋagêdô sêwiŋ eŋ sêja Aiguptu. 23Êsêac sêkôc Uria aŋga Aiguptu mêŋsêkêŋ eŋ gêdêŋ kiŋ Jojakim gêjac eŋ ŋa siŋ êndu ma kêbaliŋ ênê ŋawêlêlaŋ kêsêp lau ŋaôma nêŋ gamêŋ sêôŋa.

Sapan latu Ahukam lêma gejo Jeremia auc, tec sêkêŋ eŋ gêdêŋ lau gebe sênac eŋ êndu atom.

24

27:1 — 30:24 Apômtau kêjatu Jeremia gebe êôc ka ŋawapac teŋ êŋgôm êtu dôŋ êwa kiŋ Babilonŋa Nebukadnesar nê ŋaclai sa. Eŋ oc êkôniŋ lau-m ŋagêdô ma êkôniŋ lau Juda amboac tonaŋgeŋ. Propete dansaŋ gêjac siŋ gêdêŋ Jeremia kêtu dôŋ tonaŋŋa, mago ŋagêjô kêtap eŋ sa ma gêmac êndu. Jeremia keto papia teŋ gêdêŋ lau, taŋ sêŋgôŋ kapoacwalô aŋga Babilon ma kêsôm gêdêŋ êsêac gebe têtu wakac aŋga gamêŋ jaba, gebe oc sêŋgôŋ tônê ŋasawa ec baliŋ. Mago eŋ geoc lasê gêdêŋ êsêac amboac tonaŋgeŋ gebe êndêŋ ŋanoc oc sêmu sêna nêŋ malacmôkê êtiam.